26-anyos nga Estancianhon arestado sa ₱68K nga shabu sa Batad drug bust

BATAD, ILOILO — Isa ka 26-anyos nga lalaki halin sa Estancia ang nadakpan sa drug buy-bust operation nga ginkasa sang kapulisan takna alas 3 sang kaagahon, Agosto 20, 2022 sa Barangay Batad Viejo, Batad, Iloilo.

Ginkilala ang suspek nga si alyas "Darwin", soltero kag residente sang Brgy. Bulaqueña, Estancia, Iloilo.

Suno sa report sang Batad Municipal Police Station, ang operasyon ginpatigayon sang tingob nga pwersa sang Batad MPS Special Drug Enforcement Team sa pagpanguna ni PLT JAYPEE D. SILVESTRE, kaupod ang IPPO-PDEU sa idalom ni PCPT HAROLD A. RENDORA, kag 2nd IPMFC sa pagpanguna ni PLTCOL ELMER S. MAGBANUA. Ang tanan under sa superbisyon ni PCOL ADRIAN V. ACOLLADOR, Acting Provincial Director sang Iloilo PPO, kag sa koordinasyon sa PDEA-RO6.

Nabaklan sang police poseur-buyer ang suspek sang isa ka plastic sachet sang ginasuspetsahan nga shabu sa balor nga ₱2,000.00 nga buy-bust money.

Nakumpiskar sa posisyon sang suspek:

Pito (7) ka plastic sachets sang ginasuspetsahan nga shabu lakip na ang buy-bust item

Kapin sa 10 ka gramo nga may Standard Drug Price nga ₱68,000.00

₱2,000.00 nga buy-bust money

Isa ka wallet nga color silver kag itom

Isa ka motorsiklo

Iban pa nga drug paraphernalia

Subong, yara na sa kustodiya sang Batad MPS ang suspek kag magaatubang sa kaso nga paglapas sa Republic Act 9165 ukon "Comprehensive Dangerous Drugs Act of 2002".

Labels para sa post: News, Batad, Drug Bust, Estancia, Crime, Iloilo PPO

Photo Caption:

Arestado nga suspek kag mga nakumpiskar nga ebedensya sa drug buy-bust operation sa Batad, Iloilo. 📸 Batad MPS

Source: Radyo Timbook Facebook Page | Batad MPS