MASOBRA P2.8 MILYON NGA BALOR SANG SUSPECTED SHABU, NAKUMPISKAR SA DRUG BUY-BUST OPERATION SA ESTANCIA, ILOILO

Arestado ang isa ka lalaki kag pagkumpiskar sang ginapatihan shabu nga nagabalor sang kapin P2.8 milyon sa ginpatigayon nga drug buy-bust operation sang Estancia Municipal Police Station (MPS) pasado alas-11:00 sang gab-i, Setyembre 21, sa Barangay Poblacion Zone 2, Estancia, Iloilo.

Ginkilala ang naaresto kay alyas "Dodoy," 32 anyos, kag residente sang nasambit nga lugar.

Suno sa isa ka media interview kay Police Lieutenant Adrian Y. Balingod, hepe sang Estancia Municipal Police Station, nangin madinalag-on ang operasyon nga ginpangunahan sang mga katapo sang Estancia MPS.

Narekober sa operasyon ang tatlo (3) ka knot-tied kag tatlo (3) ka small heat-sealed transparent plastic sachets nga may unod nga ginapatihan shabu, lakip ang isa (1) ka buy-bust item, kaupod sang buy-bust money nga nagabalor sang P20,000.

Sa kabug-usan, nagalab-ot sa 415 gramos ang kabug-aton sang ginapatihan shabu nga nakumpiskar, nga may ginabanta nga balor nga P2,823,292 base sa Standard Drug Price.

Sa karon, yara na sa kustodiya sang Estancia MPS ang suspetsado para sa nagakaigo nga disposisyon kag pag-atubang sang kaso bangud sa paglapas sa Republic Act 9165 ukon Comprehensive Dangerous Drugs Act of 2002.